Kumpulan Carita Lucu: Borangan (Ngabodor Sorangan) Editor: Umi Komara Lay Out: CMJ Cover designer: CMJ Cetakan Pertama, September 2025. QRCBN : 62-839-2917-282
Buku “Borangan” atanapi Ngabodor Sorangan
mangrupikeun buku kumpulan carita lucu atawa nu pikaseurieun,
carita-carita nu ditulis mangrupakeun pangalaman nu kaalaman
sapopoé, boh pangalaman sorangan atawa pangalaman batur anu
katémpo. Mimitina ditulis pikeun bahan lomba dina kagiatan FTBI
nu diayakeun di Dinas Pendidikan Kabupaten Purwakarta. Bahan
bahan anu ditulis dikumpulkeun dina buku ieu. Sangkan bisa kapaké
ku barudak dina waktu latihan.
Borangan (ngabodor sorangan) digagas ku Taufik
Faturohman taun 2012. Mangrupakeun pembaharuan ti budaya tutur
urang Sunda nu asalna tina dongéng. Sajatina borangan lain
ngadopsi budaya luar (stand up comedy), tapi mangrupakeun
pengembangan nu pernah dilakukeun ku Jamar Media saparakanca
dina lawakan sorangan. Borangan jadi salah sahiji program acara
televisi Lokal IMTV (I-News TV) nu cukup dipikaresep ku
masyarakat.
Halodo
Assalamualaikum Wr. Wb.
Sampurasun …!
Nonton Timnas Indonésia
Jajan seblak di Bi Éuis
Ku sono ka sadayana
Ti nu séksi tur nu geulis
Kuéh donat reujeung wijén
Diical di alun-alun
hormat ka girang pangajén
Hapunten tos kumawantun
Para wargi kumaha daramang?
Di urang ayeuna keur usum halodo. Tos sababaraha dinten
kapengker cuaca téh meni panas pisan. Ku panas-panasna cuaca,
buuk kuring jadi tutung hideung. Teras ku ayana halodo ieu,
pepelakan jadi gagal panén sabab sawahna gararing. Malah aya
kajadian di lembur kuring, éta aki-aki jeung nini-nini melak paria di
kebon, naha sadaya buahna téh bet parait, teu aya nu haseum-haseum
acan, komo amis mah. Karunya teuing.
Pamiarsa ….
Sim kuring mah sok bingung ngabandungan jalmi-jaman kiwari.
Dipasihan halodo sok rumahuh, ngutruk alias kukulutus. Cenah
hareudang bayeungyang, panas ngahéab, taneuh gararing, awak jadi
hideung. Tapi mun dipasihan usum hujan, sok ngarep-ngarep iraha
halodo, tiris jeung sok banjir cenah. Ari kanggo sim kuring mah teu
aya masalah, rék hujan, rék halodo, sami-sami anugrah rizki ti Gusti
Allah nu kedah disyukuri. Leres teu?
Teu kudu rungsing dipaparin halodo da jaman kiwari mah tos aya
panangkal anti panas, anti hareudang jeung anti hideung. Cing naon
ari panangkal anti panas jeung hareudang? Ari panangkal anti
hideung naon? Aya nu apal teu?
Pamiarsa cobi tingali body abdi, putih mulus. Ceuk babaturan mah
abdi téh alus rupa siga artis. Imbitna siga biola Itali. Socana
cureuleuk siga Agnés Monica.
Padahal sim kuring mah tara ka salon da mahal biaya perawatanana.
Cekap ku dibalur ku handbody jeung ku skincare. Cobi tingali,
pameunteu abdi, kinclong kan?
Pamiarsa.
Supaya ieu rohangan jadi adem, sim kuring badé tatarucingan. Mun
tiasa nebak, dipasihan hadiah ku goyangan ala Nadira. Siap?
Hayam rintit nonggéng ka langit? Ganas.
Bujurna ditiup, awakna dirampaan? Suling.
Aya leungeun teu ramoan aya beuheung teu sirahan? Baju.
Awakna ditincak beuheungna dicekék? Sandal jepit.
Goyang….
Sakitu anu kapihatur.
Wassalamualaikum wr.wb.
